Начальные сведения о крае (по начало XII века) приводятся по «Повести временных лет». Далее — в основном, как более компактной по наличию известий, вобравшей в себя основные сведения ростовского летописания (более внимательного к судьбам Белозеръя) — по Никоновской (Патриаршей) летописи. Привлекались также Новгородская первая и ряд других летописей. В Приложении здесь дается «Хронографический рассказ о Словене и Русе и городе Словенске» по Холмогорской летописи.
В лето 6726 (1218). Князь велики Коньстянтин Всеволодичь, призъвав сыны своя к себе Василка и Всеволода и вся велможи, и бояре, и все думцы его… и обьем сына своего Василка и целовав, даде ему Ростовское княжение и тако посла его в Ростов, таже обьем другаго сына Всеволода и благослови его Ярославлем… Toe же зимы, месяца февраля в 2 день, в пяток, в 6 час дни, преставися благоверный и христолюбивый великий князь Констянтин Всеволодичь, внук Юрья Долгорукаго… Княгиня же его в той час над гробом его и пострижеся. И нарекоша имя ей Агафия. Сынове же его: Василко, Всеволод, ему же имя Дмитрей, Володимер, ему же имя Дмитрей же. (ПСРЛ. Т. X. С. 80, 81; Т. 1. С. 442-444)
В лето 6735 (1227). Князь велики Юрьи Всеволодичь жени братаничя своего князя Василка Костянтиновичя Ростовскаго у шурина у своего у князя Михаила Всеволодичя Черниговскаго. (ПСРЛ. Т. X. С. 94; Т. 1. С. 450; Т. VII С. 134, но под 6736 годом)
В лето 6739 (1231). Родися князю Василку Констянгиновичю Ростовскому сын Борис.
В лето 6744 (1236). Родися великому князю Василку Костянгиновичю Ростовскому сын Глеб. (ПСРЛ. Т. X. С. 102, 104)
В лето 6745 (1237). Тоя же зимы приидоша от восточныя страны на Рязаньскую землю, лесом; безбожнии татарове с царем Батыем… Взяша град их Рязань того же месяца [декабря. — Ю. В.] в 21, и пожгоша весь… Потом же татарове поидоша на Коломну, князь же великий Юрьи Всеволодичь посла противу им сына своего князя Всеволода… и бысть сечя зла зело… А татарове поидоша к Москве, и пришед взяша Москву… Князь велики же Юрьи Всеволодичь… остави в себе место в Володимери со владыкою князя Всеволода и Мстислава и воеводу своего Петра Ослядюковичя, а сам иде за Волгу з братаничи своими, с Василком Констянтиновичем и со Всеволодом Констянтиновичем, и с Володимером Констянтиновичем, и сташа станы на Сити, жда к себе братью свою князя Ярослава Всеволодичя и князя Святослава Всеволодичя со воинствы их, а сам начя собирати воинство… Исходящу февралю месяцу прииде вестник к великому князю Юрью Всеволодичю… яко град Владимер взят бысть, и епископ, и великая княгини, и князи, и вси людие сожжени быта, а инии избиени, и «старейшаго сына твоего Всеволода и з братьею вне града убиша, а к тебе идут»… И повеле воеводе своему Жирославу Михайловичю совокупляти воинства и окрепляти люди, и готовитися на брань, и посла мужа храбра Дорофея Семеновичя и с ним три тысящи мужей пытати татар. Он же мало отшед и паки возвратися, глаголя сице: «Господине княже! Уже обошли нас татарове»…
И нача князь велики Юрьи Всеволодичь полки ставити, и се внезапу приспеша татарове на Сить противу князю Юрью. Князь же Юрьи, отложив всю печаль, и поиде к ним, и сьступишася обои полцы, и бысть брань велика и сеча зла, и лиашеся кровь, аки вода. И попущением Божиим победиша татарове руских князей, и ту убиен бысть князь велики Юрьи Всеволодичь Владимерский и многие воеводы его, и боаре, и воиньство его избиено бысть.
А братаничя его князя Василка Костянтиновичя Ростовскаго руками яша, и ведоша его с собою до Шереньскаго леса, и сташа станы ту. И нудиша Василка много проклятии безбожнии татарове в поганьской быти воли их и воевати с ними; он же не повинуся обычаю их и никако-же покорися безаконию их… Ту абие немилостивно убиен быстъ князь Василко Костянтиновичь; си же злоба съключися месяца марта в 4 день… И причтен бысть в лице мученик.
Идущу же з Белаозера блаженому епискупу Кирилу, избывшу тамо ратных, и прииде на место, идеже убиша великого князя Юрья, и обрете тело его, взем же принесе е в Ростов…
Василка же по убиении его повергоша окааннии на лесе; виде же некая жена боголюбива Мария, и поведа мужу своему, такоже боголюбиву сушу, Андреану Поповичю. Он же взя тело его и обви плащаницею, и положиша и в скровене месте. Уведав же се епископ Кирил и княгини Василькова, послаше, взяша тело его, и яко понесоша во град Ростов… Принесше же его, положыша в церкви святыя Богородица, идеже и мати его лежить, не бе же слышати пениа во мнозе плачи. Бе же сей Василко лицем красен, очима светел и грозен взором, и паче меры храбор, сердцем же легок. А кто ему служил, хлеб его ел, чашу его пил, той за его любовь никакоже можаше у иного князя быти, ни служити: излише бо слугы своя любляше; мужество и ум в нем живяше, правда же и истинна с ним ходиста, бе бо всему хитр. (ПСРЛ. Т. X. С. 105-107, 109-112; Т. 1. С. 460-467)
В лето 6746 (1238). Прииде князь Ярослав Всеволодичь, брат великого князя Юрья Всеволодичя, из Великого Новаграда в Володимер на великое княжение*… А князь Борис Василковичь сяде в Ростове… а брат его князь Глеб Василковичь сяде на Белеозере. (ПСРЛ. Т. X. С. 113)
В лето 6753 (1245). Князь велики Ярослав Всеволодичь… з братьею своею и з братаничем своим со князем Владимером Констянтиновичем, и з братаничя его Василка Ростовскаго с сынми, Борисом и Глебом, и братаничя его Всеволода с сыном Василием… поиде во Орду к царю Батыю.
В лето 6757 (1249). Князь Глеб Василковичь… ходи во Орду к Батыеву сыну ко царю к Сартаку. Царь же Сартак почти его зело и отпусти в свою его отчину. (ПСРЛ. Т. X. С. 137; Т. 1. С. 472)
В лето 6759 (1251). Поехавь Глебь на Белоозеро в свою отчину. От Глеба князя Белозерскыи пошли. (ПСРЛ. Т. XV. С. 400; T.I. С. 473; Т. X. С. 138)
В лето 6765 (1257). Идоша в Орду князь велики Александр Ярославичь Володимерский** и князь велики Борис Василковичь Ростовский, и князь велики Андрей Ярославичь Суздалский со многими дары и чествовавше у Уланчиа, и возвратишася со многими честьми во своя их отчины. Того же лета князь Глеб Василковичь женися во Орде и прииде из Кановы земли (9) от царя со многою честию в свою отчину. (ПСРЛ. Т. X. С.141)
В лето 6766 (1258). Идоша во Орду князь велики Александр Ярославичь Владимерский… и отпущены быша со многою честию на Русь, и приидоша тоя же осени кийждо в своя отчины. Тоя же осени приехаша изо Орды князь Борис Василковичь Ростовский и брат его князь Глеб Василковичь со княгинею своею в Ростов и удари челом пресвятей Богородици, и знаменася у образа ея, и благословися у отца своего у Кирила епископа и у матери своей у великие княгини Марьи. (ПСРЛ. Т. X. С. 141; Т. 1. С. 475)
В лето 6771 (1263). Родися князю Глебу Василковичю Белозерскому сын Михайло (10). (ПСРЛ. Т. X. С. 143; Т. 1. Вып. 3. С. 524)
В лето 6776 (1268). Князь Глеб Василковичь Белозерский и прииде из Татар болен зело, и быв в немощи время немало, и пакы милостию Божиею и пречистыя Богородици бысть здрав. (ПСРЛ. Т. X. С. 147)
В лето 6777 (1269). Преставися князь Дмитрей Святославичь, внук Всеволож… Ту сущу князю Глебу Василковичю и матери его седящу у него… И погребоша его в церкви святаго Михаила в Юрьеве манастыре. (ПСРЛ. Т. X. С. 147)
В лето 6779 (1271). Преставися княгини Василкова**, тогда у ней сущу сыну ея князю Борису и с княгинею своею, и з детми, а князю Глебу тогда сущу во Орде у царя… Положи ю в церкви святаго Спаса в ее манастыре. (ПСРЛ. Т. X. С. 150; Т. XV. С. 404)
В лето 6782 (1274)*. Преставися великая княгини Глебова Феодора, епископ же Игнатей Ростовский с священным сьбором певше над нею надгробныя песни и положиша ея в церкви пречистый Богородици в Ростове. (ПСРЛ. Т. X. С. 152; Т. XV. С. 404)
* По Тверской летописи: 20 декабря 6781 года.
В лето 6785 (1277). Поидоша князи во Орду: князь велики Ростовский Борис Василковичь… с княгинею и з детми и брат его князь Глеб Василковичь Белозерский и с сыном своим Михаилом, и князь Феодор Ярославский Ростиславичь…
Подобает же о сем ведати како сей глаголется князь Федор Ростиславичь Ярославский, понеже родом бе не Ярославский, но Смоленский. Слыша убо: князь велики бе Киевский Владимер Маномах Всеволодичь, у него же бе старейший сын Мстислав, ему же дан Смоленеск, аще и на великом княжении в Киеве после отца своего седяше, на нем же и Преставися, но глаголется Смоленский; его же сын Ростислав князь велики Смоленский, Ростиславль сын Давид князь велики Смоленский, Давидов сын Мстислав. Мстиславль сын Ростислав, Ростиславли сынове: Феодор, о нем же ныне глаголем, да брат его Глеб, да Михаиле; сии изобидеша его и даша ему град Можаеск един; а брат его Глеб на великом княжении седяше в Смоленсце. А князю Феодору Ростиславичю, о нем же днесь глаголем, седящу в Можайску, еще не имущу жены. В Ярославли же преже князь велики бе Всеволод Констянтиновичь, внук Юрья Долгорукаго, правнук Владимера Маномаха. У Всеволода Констянтиновичя Ярославскаго сын Василей, у Василья Всеволодичя Ярославскаго дщерь, Василыо же Всеволодичю Ярославскому преставльшуся на Ярославле, и седяше по смерти его на Ярославли княгини его с дщерью его. И сослася князь Феодор Ростиславичь из Можайска со князем Борисом Василковичем Ростовским и з братом его со князем Глебом Василковичем Белозерским, и со княгинею Васильа Всеволодичя Ярославскаго, хотяще понята дщерь ея: и сему бывшу поять ю за себя, и того ради достася ему великое княжение Ярославское, и тако возприат град Ярославль, и начя княжити в нем и з тещею своею, и много добродетелен бысть…
Того же лета князь велики Борис Василковичь Ростовский… во Орде разболеся и хотяше во иноческий чин пострищися, его же уимаше княгиня его Марья, чааше бо живота его.
В лето 6786 (1278). Преставися князь велики Борис Василковичь Ростовский… во Орде, месяця сентября в 16 день, на память святыя мученицы Еуфимьи. Княгиня же его Мариа с сыном своим Дмитрием привезоша его изо Орды в Ростов… Положиша его в соборной церкви пречистыя Богородици, на левой стране, в Ростове, месяца ноября в 13 день, на паметь иже во святых отца нашего Иоанна Златоустаго. Его сынове: Дмитрей, Константин.
И сяде по брате своем, великом князе Борисе Василковиче, на великом княжении в Ростове Глеб Василковичь Белозерский. Живущим же им у царя во Орде: великому князю Глебу Василковичю Ростовскому… з братаничем своим со князем Константином Борисовичем… и со князем Феодором Ростиславичем Ярославским… и со князем Андреем Александровичем, внуком Ярославлим, правнуком Всеволожим, и со иными многими князи, и з бояры, и со слугами своими.
И возхоте царь Менту Темирь ити на войну, и повеле князем всем преже реченным и з боары своими, и с слугами наряжатися с ним. И помале поиде сам царь Менту Темирь со князи русскими, и поможе Господь Бог князем русским, и взяша славный град ясъский* Дадаков зиме, месяца февраля в 8 день… и полон, и богатства много взяша, а иных смерти предаша, а град их съжгоша. Царь же Менту Темирь, почтив добре князей русских и похвалив велми и одарив всех, и отпусти их на Русь в свои их отчины с многою честию и з дары….
Того же лета князь Глеб Василковичь Ростовский прииде изо Орды от царя Менту Темиря, быв с ним на войне и с сыном своим Михаилом, и з братаничем своим Констянтином Борисовичем, внуком Василковым, и приведоша с собою множество полона и богатства, и в чести велице быша у царя. И внидоша в град Ростов… и бысть радость велиа во граде Ростове.
Того же лета князь велики Глеб Василковичь Ростовский жени сына своего Михаила у великого князя Феодора Ростиславичя Ярославскаго, и венчан бысть в церкви пречистыя Богородици в Ярославле Игнатием, епископом Ростовским, ту сущу и самому князю Глебу Василковичю Ростовскому з братаничем его Констянтином Борисовичем, внуком Василковым, правнуком Констянтиновым, и князь Давид Констянтиновичь Галичский и Дмитровский, внук Ярославль, правнук Всеволож, праправнук Юрья Долгорукаго, и Давиду Явидовичю, и множество бояр, и съезд велий отвсюду, и бысть радость велиа в Ярославле, месяца июля в 15 день… Князь же великий Глеб Василковичь… сътвори у себя пир велик в Ярославле и почти свата своего Феодора Ростиславичя Чрънаго и княгиню его, и з детми его, и зятя его Давида Контянтиновичя Галичьскаго и Дмитровскаго, и бояр его, и слуг его…
Того же лета князь велики Глеб Василковичь Ростовский посла сына своего Михаила в Татары на войну с сватом своим, с князем Феодором Чръным Ростиславичем Ярославским.
Того же лета преставися князь велики Глеб Василковичь Ростовский, внук Констянтинов, правнук Всеволож, праправнук Юрья Долгорукаго, препраправнук Владимера Маномаха, пращур Всеволож, прапращур Ярославль, препрапращур великого Владимера, жив от рожениа своего лет 41. По пленении же татарском от юности своея служи татаром и много христиан обидимыя от них избави, и печялныя утеши, брашно свое и питие не щади, но требующим подаяше и многу милостыню убогим и нищим, и странным, сиротам и вдовицам подаваше, поминая слово Господне… И церкви многи созда и украси иконами и книгами, и священнический и иноческий чин зело почиташе, и ко всем любовен и милостив бе, и смирен, ненавидяще бо гордости и отвращашеся от нея аки от змиа… Немалу жалость и плачь остави по себе всем знающим его. Епископ же Игнатей Ростовский со священным собором… положиша его в церкви пречистыя Богородици в Ростове. Сего сынове: Михайло. И седе по нем в вотчине его на Белеозере, а в Ростове по Глебе Василковиче седоста братаничи его: князь Дмитрей Борисовичь, внук Василков, да брат его Констянтин Борисовичь. (ПСРЛ. Т. X. С. 154-156)
* Ясъский — город ясов, то есть осетин.
Источник: https://www.booksite.ru/fulltext/2be/loz/erye/6.htm
