При державе Великого Государя Царя и Великого Князя Алексия Михайловича всея великия и малыя и белыя России самодержца Чаронския округи[1] веси нарицаемыя Тимофеевския роду Сокориных некто именем Марк пятинадесяти лет по Указу Великого Государя взят бысть в солдаты и послужи Государю двадесят лет верою и правдою, потом же отпущен бысть, и слыша Господа во святом Евангелии глаголюща: и всяк иже оставит дом или братию или сестры или матерь или жену или чада или села имени моего ради, сторицею приимет и живот вечный наследит; иже хощет по мне ити, да отвержется себе и возмет крест свой и по мне грядет, он же благоразумный муж по евангельскому словеси не пойде в дом свой, но абее иде в монастырь Кирилла Белоезерского Чудотворца, и пострижеся тамо и наречено бысть ему имя Макарий, и поживе в монастыре во всяких трудех, и в посте и молитве со страхом Божиим, в послушании со всяким благочинием, в безмолвии многое время, и помышляше в себе: понеже мнози от человек христолюбивых во славу Триипостасныя и Нераздельныя Троицы Отца и Сыны и Святаго Духа, похвалу же Пресвятыя Приснодевы и Богородицы Марии и в честь святых угодников Божиих, воздвигоша святыя храмы, си есть церкви и обители, и в них молящеся получиша себе вечную славу не небесех. Того ради сей монах Макарий, ревнуя оным богоугодником, наипаче от мира сего адаляющимся и верхи гор лобызающим, моляшеся Богу, дабы удалитися мiра и вселитися в пустыню, наедине быти с Богом, и во сто осмдесят первом году месяца июня в 9 день, на память преподобнаго отца нашего Кирилла Белоезерского чудотворца, по всенощном бдении случися ему Макарию ити в келлию свою, и абие осени его свет велий, Макарий же паде на землю, и глас бысть свыше: Макарие услышана бысть молитва твоя, иди на запад, тамо ти место уготовано, хощу тя сотворити мученика. Он же возстав от земли и оглядаше семо и овамо, и никого же видя, токмо на западе виде: столп огненный сояше от земли до небеси, и помышляше в себе повелению Божию быти, никому же поведа и благословися у игумена и пойде на запад, столп же огненный стояще пред ним днем и нощию, он же без сна ускоряше ити и де новгородския епархии заонежския страны Виницкаго погоста, на месте пусте высокое езеро кругло в длину и в ширину по ? версты, столп же огненный стояше посреди того езера. Макарий же усмотре другое ниже того, меж или гору высокую, на той
постави себе келлию и часовню, и нача гору копати снизу, столп же огненный невидим бысть, и трудися седмь лет, не дая очима своима сна, ни веждома своима дремания. Прокопав от езера до езера ров глубостию седмь, длиною же сто сажень, пропустил воду из единого езера в другое все досуха, и посреде того изсякшего езера, идеже виде столп огненный, по указу блаженныя памяти Великого Господина Преосвященнаго Корнилия Митрополита Великаго новаграда и великих лук, при Благоверном Великом Государе Царе и Великом Князе Феодоре Алексеевиче всея великия и малыя и белыя России Самодержце, воздвигнул церковь древяную во имя воскресения Господа Бога и Спаса нашего Иисуса Христа, и созда обитель яже наречеся пустыня Высокоезерская, в ней же братию собра, от создания мiра 191 году, от воплощения Бога Слова 1670 лето, и живе во обители три лета богоугодне, и достиже до лет Благоверных Государей Царей и Великих Князей Иоанна Алексеевича и Петра Алексеевича всея великия и малыя и белыя России Самодержцев. И искони века диавол, ненавидяй добра роду человеческому: навождением диавольским, по навету некоему злых человек христоненавистных, пришедше разбойники в пустыню, сего Макария связавше биша и огнем жгоша и древяныя стружцы за ногти ему в руки и ноги вогнаша и всячески мучиша, и оставиша его еле жива суща, и братию его разгнаша и обитель разграбиша месяца октоврия в первый день. Случися ту ити мимошедшему священнику Иосифу Титову, прииде к нему в келлию, он же Макарий исповедася и Святым Елеем помазася и Святых Христовых Таин причастися от его, священника, и повеле ми многогрешному попу Иосифу житие писати при кончине живота своего, и сказа мне вся подробну, аз же многогрешный поп житие его списах и в пустыни оставих в церкви Божией, потом все исходное пение проглаголах над ним, и Господеви душу свою предаде месяца октоврия в 3-й день, и погребен бысть в созданной от него обители у церкви воскресения Христова тем же священником. Богу нашему слава.
[1] Чаронская округа находилась на севере европейской части Русского царства в бассейне рек Свидь, Модлона, Вожега и озера Воже. Через округ проходил западный водный путь в Поморье.
