Тропарь преподобному Макарию Высокоезерскому.*
Глас 3.
От юности Отечеству земному служив, блаженне,/ паче всяческих Бога возлюбил еси./ Жития пустынного взыскав,/ из обители Кирилла Белоезерскаго на брег езера Высокаго притекл еси,/ преподобне отче наш Макарие./ Постами, трудами и молитвами терние страстей искоренил еси./ Ныне пред престолом Всевышнего предстоя,/ дивный строителю церкве Обновления Господня,/ моли Владыку всех// очистити храмы телес наших.
Кондак преподобному Макарию Высокоезерскому.
Глас 2.
Любве ко Господу пламенный ревнителю,/ древним пустынножителем подражателю,/ преподобне отче Макарие,/ научи нас сердца горе имети/ и с тобою к милосердию Человеколюбца взывати:// Господи, Иисусе Христе, Сыне Божий, помилуй нас, грешных.
Молитва преподобному Макарию Высокоезерскому.
О, угодниче Христов, преподобне отче Макарие, к твоему покрову прибегающе, смиренно молим тя: помози нам, немощным, единаго Бога всею душею любити, заповеди Господни усердно исполняти, в чистоте сердце содержати, ум непрестанно к Богу возводити, о часе смертнем памятствовати, смирение и любовь Христову стяжати, братолюбным и единодушным жительством Отца Небеснаго радовати, да твоими молитвами наставляеми, достигнем Царствия Божия и купно с тобою прославим Милостиваго Бога, Отца и Сына и Святаго Духа, ныне и присно и во веки веков. Аминь.
*Употребление тропаря, кондака, молитвы благословлено епископом Череповецким и Белозерским Флавианом в пределах Череповецкой епархии.
