Тропарь Божией Матери пред иконой Ее Белозерской
Глас 4:
Днесь ликует земля Белозерская,/ веселится страна Череповецкая,/ се бо Пречистая Владычице/ милосердно дарова людем образ Свой./ Славословим Тя и с верою под покpов Твой, Мати Божия, пpитекаем,/ и преклоньше колена сердец умоляем:/ Отечество от нахождения иноплеменных заступи,/ от междоусобныя брани сохрани,/ утеши скорбящих, гордыя нравы исправи,/ на путь покаяния направи// и спаси души наша.
Кондак Божией Матери пред иконой Ее Белозерской
Глас 3:
Во праздник Твой сошедшеся, Владычице,/ днесь благоговейно торжество Твое, Мати Дево, совершаем,/ Божественному Сыну Твоему славу возносим/ и за образ Твой чудный Белозерский благодарим,/ Тебя же, Пресвятая Богородице, с любовию ублажаем:/ радуйся, Заступнице милосердная,/ помощию уповающих на Тя не оставляющая,// радуйся, умиление сердцам нашим дарующая.
Молитва Божией Матери пред иконой Ее Белозерской
О, Пречистая Богородице, земли Белозерския светом образа Твоего, яко солнце пресветлое, озарившая и мнози люди пребыванием зде иконы Твоея чудныя возвеселившая!
О, любве неиссякаемый Источниче, воззри милостивно на нас, с верою к Тебе притекающих, и, яко Мати милосердная, нас, жестокосердных, исправи и на путь покаяния направи, заблудших вразуми, от всякаго зла заступи, вознося непрестанно молитвы к Божественному Твоему Сыну, да помилует и спасет нас!
О, Предивная Владычице! Молим Тя, Царице Небесе и земли, от бед и скорбей люди Твоя избави и в добродетели настави, болящих исцели, скорбящих утеши, грады наши и страну Российскую от междоусобныя брани и нашествия иноплеменных сохрани, искушение проходящих укрепи.
О, Дево Всепетая, чадолюбивая Горлице, не забуди нас, грешных, во вся дни живота нашего, но выну с нами пребывай и богоугодно жити помогай, да едиными усты и единым сердцем славим Отца и Сына и Святого Духа во веки веков. Аминь.