Прп. Иродион Илоезерский. Миниатюра из сборника житий и повестей. 2-я пол. XVIII в. (Гос. музей-усадьба «Архангельское». Инв. № 18405. Л. 109 об.)
Не во многа времена и в наша лета содеяся Божиим изволением. Преподобному и богоносному отцу нашему Корнилию игумену ко Господу отшедшу, ученицы же его, оставлше своего пастыря и учителя и приимше своя воля, коиждо желая на игуменство, а инии на келарство, и ини же на нарядничество, и инии жесвятии и преподобнии отцы узским и тесным путем путшествующе, сии же от власте и небрегоми быста. И изыдоша мнози овии изКорнилиева монастыря и идоша на восток, а инии на северную страну к Белу езеру.
Прииде же преподобный отец наш Иродион схимник в волость Овве, нарицаемую Илоские, на Уломезеро. И вселяся ту преподобныи Иродион, часовню и келию постави и поживе ту в добре подвизании многа лета. И от труда своего во едину убо от нощи от великаго бдения вниде в тонок сон. И се ж, мало ему спящу, и прииде к нему глас, глаголя «Убудися, востани, старче, и иди в весь, нарицаемую Межьозерье, на остров, еже на Илоезеро, и ту на острову постави церковь Пречистыя Богородицы честнаго Ея Рождества, и ту уготовахти место». Востав преподобный от сна и сотворив молитву, размышляше в себе видению тому. По явлении же том поиде преподобныи к веси, рекомеи Межьозерию, и прииде на реку, зовомую Рыбницу. И помолися Богу, мало успепреподобныи от путнаго шествия и слышав манием звон на том Илоезере. И востав преподобный от сна, благодарив в себе Бога и Пречистую Богородицу, и вскоре прииде на остров, и походи на нем, и возлюби его, что угодно иноком жителствовати, и купи преподобныи тот остров у некоего боголюбива мужа, зовомаго Анисим. И постави церковь преподобныи отец наш Иродион во имя Рождества Пресвятыя Владычицы нашея Богородицы, и украсив ю иконами Господни и утварию церковною, аки невесту Христову. И живее преподобныи у церкви Пречистыя Богородицы в трапезе лета доволна.
И мнози к нему приходяще пользы ради и поучахуся от него. И кто ему принося пищу, и он то все раздаяше нищим, а сам мало ядше, толко от глада ему не пастися. По смотрению Божию прииде к преподобному с пищею боголюбив муж, зовомыи Елисеи, и молитву творя у трапезы. И не бысть к нему ответу. Постоя мало, второе сотвори молитву. И не бысть ему гласа. И в третие сотвори молитву. Святыи же ему не отвеща. И вниде муж тои в трапезу, и не виде святаго. И прииде к пеще, анже преподобный в пеще на горящем угли лежаше. И увидев преподобныи Иродион Елисеа, вскоре изыде из пещи горящия. Преподобный же Иродион ко Елисею глагола: «Прости мя, честныи отче, Бога ради!». И муж же той, во ужасе велице бых от огня, разгоревшися убо углия, что невозможно противо пещи близ стояти, сему же преподобному Иродиону возлежащу на огненном угли яко на месте покоине.
Христиане, окрест живущии нача приходити к Пречистой Богородицы, мужы и жены: дети креститити, свадбы венчати и умирающих у Богородицы похраняти, и молва велия бысть. Сей же преподобный отец наш Иродион моля Христа Бога, чтобы ему не видети жен, красящихся ризами или их умастения. И бысть не видя. Христиане, приходя, мольбы творяху Христу Богу нашему и Пречистеи Богородцы, потребная приношаху, на монастыре у Пречистые Богородицы пияху, и молва велия бысть пиянства ради, и скаредныя всякия речи износя мирские люди. И не можаше святыи Иродион слышати скаредства того, молящуся Христу Богу, чтобы ему не слышати. И бысть не слыша. И кто к нему приходя неподобен, и преподобныи Иродион возбраня по имени, и с неподобными и нечювственными не глагола ничтоже. И кто ему принося пищу, и святыи Иродион все раздаяше нищим. И от субботы до субботы преподобныи Иродион причащашеся Святых Христовых Таин, и мало хлеба ядя, и в меру воды пия, и по вся нощи без сна пребывая, а удручения ради телеснаго в бани во вся дни живота своего не мывся.
Икона «Белозерские чудотворцы». Храм преподобного Иродиона Илоезерского Череповецкой епархии.
И возвещено бысть преподобному Иродиону смерть ангелом Божиим. И причастився Святых Христовых Таин от священноинока Исаии. И едино и убо минувши нощи, прииде к преподобному Исаиа, и бысть благоухание велие, и вниде в келию, и преподобному Иродиону, к Господу отшедшу, лежа в схиме, руки же на грудех крестообразно положены. Исаиа же, и Елисеи, и инии боголюбивии мужи со псалмы, и песньми, и пени духовными честное его тело похраниша честне в часовне на острову у Пречистые Богородицы на Илоезер месяца сентября в 28 день, на память преподобнаго отца нашего Харитона исповедника о Христе Иисусе Господе нашем, Ему же слава ныне и присно и во веки веков. Аминь.
Источник: А. Лифшиц. Преподобный Иродион Илоезерский и основанная им Междуозерская в честь Рождества Богородицы пустынь.
